Rezistenca ndaj Antibiotikëve

Çfarë janë antibiotikët?

Antibiotikët janë barna që trajtojnë infeksionet bakteriale te njerëzit dhe kafshët. Ata veprojnë duke vrarë bakteret ose duke i bërë të vështirë rritjen dhe shumëzimin e tyre. Kur përdoren në mënyrë të duhur, antibiotikët mund të shpëtojnë jetë. Por ekziston një problem në rritje i rezistencës ndaj antibiotikëve.

Çfarë është rezistenca ndaj antibiotikëve?

Rezistenca ndaj antibiotikëve ndodh kur bakteret ndryshojnë dhe mund të rezistojnë ndaj efekteve të një antibiotiku. Bakteret nuk vriten dhe vazhdojnë të rriten. Infeksionet që shkaktojnë këto baktere quhen infeksione rezistente. Infeksionet rezistente mund të jenë të vështira, dhe ndonjëherë të pamundura për t’u trajtuar. Në disa raste, ato mund të jenë edhe vdekjeprurëse.

Rezistenca ndaj antibiotikëve nuk do të thotë se trupi juaj është rezistent ndaj antibiotikëve.

Ekzistojnë shumë lloje të ndryshme infeksionesh rezistente. Ato përfshijnë MRSA dhe tuberkulozin rezistent ndaj barnave (TB). Nëse merrni një infeksion rezistent, mund t’ju duhet:

• Qëndrim i gjatë në spital
• Shërim i gjatë
• Vizita pasues me ofrues kujdesi shëndetësor
• Trajtime të shtrenjta dhe që mund të kenë efekte anësore të rënda

Rezistenca ndaj antibiotikëve është një lloj rezistence antimikrobike. Ekzistojnë lloje të tjera; viruset, kërpudhat, dhe parazitët gjithashtu mund të bëhen rezistentë ndaj barnave.

Si bëhen bakteret rezistente ndaj antibiotikëve?

Rezistenca ndaj antibiotikëve është një proces natyror që ndodh me kalimin e kohës. Për të mbijetuar, bakteret mund të zhvillojnë strategji mbrojtëse kundër antibiotikëve. Kjo ndodh përmes ndryshimeve gjenetike në baktere. Këto baktere rezistente mbijetojnë, rriten dhe përhapen.

Çdo herë që merrni antibiotikë, ekziston rreziku që bakteret të bëhen rezistente. Prandaj është e rëndësishme të merrni antibiotikë vetëm kur ju duhen me të vërtetë. Ata nuk do të veprojnë në infeksionet virale si të ftohtit dhe gripi. Dhe nuk ju duhen antibiotikë për çdo infeksion bakterial. Për shembull, mund të mos ju duhen për disa infeksione sinusale dhe të veshit.

Kush ka më shumë gjasa të zhvillojë një infeksion rezistent ndaj antibiotikëve?

Çdokush mund të zhvillojë një infeksion rezistent ndaj antibiotikëve, por disa njerëz mund të jenë në rrezik më të lartë, përfshirë ata që:

• Kanë një sistem imunitar të dobësuar nga sëmundje si HIV ose nga marrja e barnave që ndikojnë në sistemin imunitar
• Marrin kujdes mjekësor si operacione dhe qëndrime në spital
• Marrin antibiotikë për një kohë të gjatë
• Janë foshnje, veçanërisht nëse kanë lindur para kohe
• Janë të moshuaj

Si mund të parandalohet rezistenca ndaj antibiotikëve?

Gjithmonë do të ketë një farë rezistence ndaj antibiotikëve, përderisa ajo ndodh në mënyrë natyrore. Por ju mund të ndihmoni në luftën kundër rezistencës ndaj antibiotikëve duke ndërmarrë këto hapa:

• Mos i përdorni antibiotikët për viruset.
• Mos i bëni presion ofruesit tuaj të kujdesit shëndetësor të ju japë një antibiotik nëse ata nuk mendojnë se ju duhet.
• Kur merrni antibiotikë, ndiqni me kujdes udhëzimet.
• Mos ua ndani antibiotikët e tuaj të tjerëve.
• Mos i ruani antibiotikët për më vonë ose mos përdorni recetën e dikujt tjetër.
• Ndihmoni në parandalimin e përhapjes së infeksioneve bakteriale me zakone të mira higjiene. Këto përfshijnë larjen e duarve shpesh dhe mbulimin e gojës dhe hundës kur kolliteni ose teshtini.

Qendrat për Kontrollin dhe Parandalimin e Sëmundjeve