Çfarë është mieliti akut flaksid (AFM)?
Mieliti akut flaksid (AFM) është një sëmundje neurologjike. Ai është i rrallë, por serioz. Ai prek një zonë të palcës kurrizore të quajtur lëndë e hirtë. Kjo mund të shkaktojë dobësim të muskujve dhe reflekseve në trup.
Për shkak të këtyre simptomave, disa njerëz e quajnë AFM-në sëmundje “si polio”. Por ai është i ndryshëm nga polio. AFM-ja nuk shkaktohet nga viruset e polios.
Çfarë shkakton mielitin akut flaksid (AFM)?
AFM-ja mund të shkaktohet nga disa viruse të ndryshëm. Studiuesit mendojnë se enteroviruset kanë shkaktuar rritjet e fundit të numrit të fëmijëve me AFM. AFM-ja gjithashtu mund të shkaktohet nga viruse të tjerë, përfshirë flaviviruset, herpesviruset dhe adenoviruset.
Shumica e njerëzve me AFM kishin një sëmundje të lehtë respiratore ose temperaturë (si ajo që mund të merret nga një infeksion viral) përpara se të merrnin AFM-në.
Kush ka më shumë gjasa të zhvillojë mielitin akut flaksid (AFM)?
Kushdo mund të marrë AFM-në, por shumica e rasteve (mbi 90%) kanë qenë te fëmijët e vegjël.
Cilat janë simptomat e mielitit akut flaksid (AFM)?
Shumica e njerëzve me AFM do të kenë papritur:
- Dobësi të krahëve ose këmbëve
- Humbje të tonusit dhe reflekseve muskulore
Disa njerëz gjithashtu kanë simptoma të tjera, përfshirë:
- Varje/dobësi të fytyrës
- Vështirësi në lëvizjen e syve
- Qepalla të varura
- Vështirësi në gëlltitje
- Të folur i paqartë
- Dhimbje në krahë, këmbë, shpinë ose qafë
Ndonjëherë AFM-ja mund të dobësojë muskujt e nevojshëm për frymëmarrje. Kjo mund të çojë në dështim respirator, i cili është shumë serioz. Nëse keni dështim respirator, mund të ju duhet të përdorni një ventilator (makinë frymëmarrjeje) për t’ju ndihmuar të merrni frymë.
Nëse ju ose fëmija juaj zhvillon ndonjë nga këto simptoma, merrni kujdes mjekësor menjëherë.
Si diagnostikohet mieliti akut flaksid (AFM)?
AFM-ja shkakton shumë nga të njëjtat simptoma si sëmundjet e tjera neurologjike, si mieliti transvers dhe sindroma Guillain-Barre. Kjo mund ta bëjë diagnostikimin të vështirë. Për të zbuluar nëse keni AFM, mjeku juaj mund të përdorë:
- Një ekzaminim neurologjik, duke përfshirë vëzhgimin e dobësisë, tonusit të dobët të muskujve dhe reflekseve të pakësuara
- Një MRI për të parë palcën kurrizore dhe trurin
- Testime laboratori në lëngun cerebrospinal (lëngun rreth trurit dhe palcës kurrizore)
- Studime të përçimit të nervave dhe elektromiografisë (EMG). Këto teste kontrollojnë shpejtësinë e nervave dhe përgjigjen e muskujve ndaj mesazheve nga nervat.
Është e rëndësishme që testet të kryhen sa më shpejt pas fillimit të simptomave.
Cilat janë trajtimet për mielitin akut flaksid (AFM)?
Nuk ka trajtim specifik për AFM-në. Një mjek i specializuar në trajtimin e sëmundjeve të trurit dhe palcës kurrizore (neurolog) mund të rekomandojë trajtime për simptoma specifike. Për shembull, fizioterapia dhe/ose terapia okupacionale mund të ndihmojnë me dobësinë e krahëve ose këmbëve. Studiuesit nuk dinë rezultatet afatgjata të njerëzve që marrin AFM-në.
A mund të parandalohet mieliti akut flaksid (AFM)?
Nuk ka mënyrë specifike për të parandaluar AFM-në. Por ju mund të merrni hapa për të parandaluar sëmundjen nga një virus duke:
- Larë duart shpesh me sapun dhe ujë
- Shmangur prekjen e fytyrës me duar të palara
- Shmangur kontaktin e ngushtë me njerëz të sëmurë
- Pastruar dhe dezinfektuar sipërfaqet që i prekni shpesh, përfshirë lodrat
- Mbuluar kollën dhe teshtitjet me një pecetë ose mënykën e sipërme të këmishës, jo me duar
- Qëndruar në shtëpi kur jeni i sëmurë
Qendrat për Kontrollin dhe Parandalimin e Sëmundjeve
Informacioni i dhënë këtu nuk duhet përdorur gjatë ndonjë urgjence mjekësore ose për diagnostikimin apo trajtimin e ndonjë gjendjeje mjekësore. Një profesionist i licensuar mjekësor duhet të konsultohet për diagnostikimin dhe trajtimin e çdo dhe të gjitha kushteve mjekësore. Lidhjet me sajte të tjera jepen vetëm për informacion - ato nuk përbëjnë aprovime të atyre sajteve të tjera. Nuk bëhet asnjë garanci e çfarëdo lloji, as e shprehur dhe as e nënkuptuar, sa i përket saktësisë, besueshmërisë, kohës ose korrektësisë së ndonjë përkthimi të bërë nga një shërbim i palës së tretë i informacionit të dhënë këtu në ndonjë gjuhë tjetër.
