Sëmundjet Autoimune

Çfarë janë sëmundjet autoimune?

Sistemi juaj imunitar ju mbron nga sëmundjet dhe infeksionet duke sulmuar mikrobet që futen në trupin tuaj, si viruset dhe bakteret. Sistemi juaj imunitar mund të dallojë se mikrobet nuk janë pjesë e trupit tuaj, prandaj i shkatërron. Nëse keni një sëmundje autoimune, sistemi juaj imunitar sulmon qelizat e shëndetshme të organeve dhe indeve tuaja gabimisht.

Ekzistojnë mbi 80 lloje sëmundjesh autoimune. Ato mund të prekin pothuajse çdo pjesë të trupit tuaj. Për shembull, alopecia areata është një sëmundje autoimune e lëkurës që shkakton rënien e flokëve. Hepatiti autoimun prek mëlçinë. Në diabetin e tipit 1, sistemi imunitar sulmon pankreasin. Dhe në artritin reumatoid, sistemi imunitar mund të sulmojë shumë pjesë të trupit, duke përfshirë nyjet, mushkëritë dhe sytë.

Çfarë i shkakton sëmundjet autoimune?

Askush nuk di me saktësi pse ndodhin sëmundjet autoimune. Por ju nuk mund t’i merrni ato nga të tjerët.

Sëmundjet autoimune priren të jenë në familje, la do të thotë se disa gene mund t’i bëjnë disa njerëz më të prirur për të zhvilluar një problem. Viruset, disa kimikate dhe gjëra të tjera në mjedis mund të shkaktojnë një sëmundje autoimune nëse tashmë keni gjenet për të.

Kush është në rrezik nga sëmundjet autoimune?

Miliona amerikanë të të gjitha moshave kanë sëmundje autoimune. Gratë zhvillojnë shumë lloje sëmundjesh autoimune shumë më shpesh se burrat. Dhe nëse keni një sëmundje autoimune, jeni më të prirur të merrni një tjetër.

Cilat janë simptomat e sëmundjeve autoimune?

Simptomat e një sëmundjeje autoimune varen nga pjesa e trupit tuaj që preket. Shumë lloje sëmundjesh autoimune shkaktojnë skuqje, ënjtje, nxehtësi dhe dhimbje, të cilat janë shenjat dhe simptomat e inflamacionit. Por edhe sëmundje të tjera mund të shkaktojnë të njëjtat simptoma.

Simptomat e sëmundjeve autoimune mund të vijnë dhe të shkojnë. Gjatë një përkeqësimi, simptomat tuaja mund të bëhen të rënda për një kohë të shkurtër. Më pas, mund të keni një remision, gjë që do të thotë se simptomat tuaja përmirësohen ose zhduken për një periudhë kohore.

Si diagnostikohen sëmundjet autoimune?

Mjekët shpesh e kanë të vështirë diagnostikimin e sëmundjeve autoimune. Zakonisht nuk ka një test specifik për të treguar nëse keni një sëmundje të caktuar autoimune. Dhe simptomat mund të jenë konfuze. Kjo ndodh sepse shumë sëmundje autoimune kanë simptoma të ngjashme. Dhe disa simptoma, si dhimbjet muskulore, janë të zakonshme në shumë sëmundje të tjera. Prandaj mund të duhet shumë kohë dhe disa vizita te lloje të ndryshme mjekësh për të marrë një diagnostikim.

Për t’i ndihmuar mjekut tuaj të zbulojë nëse një sëmundje autoimune po shkakton simptomat tuaja:

• Mësoni rreth gjendjes shëndetësore në historinë familjare. Çfarë problemesh shëndetësore kishin gjyshërit, hallat, dajat dhe kushërinjtë tuaj? Shkruani atë çka mësoni dhe ndajeni me mjekun tuaj.
• Mbani shënim simptomat tuaja, duke përfshirë se sa gjatë zgjasin dhe çfarë i bën ato më mirë ose më keq. Ndani shënimet tuaja me mjekun tuaj.
• Vizitoni një specialist që merret me simptomat që ju shqetësojnë më shumë. Për shembull, nëse keni erupsion, vizitoni një dermatolог (mjek lëkure).

Cilat janë trajtimet për sëmundjet autoimune?

Trajtimi varet nga sëmundja. Në shumicën e rasteve, qëllimi i trajtimit është të shtypë (ngadalësojë) sistemin tuaj imunitar dhe të lehtësojë ënjtjen, skuqjen dhe dhimbjen nga inflamacioni. Mjeku juaj mund t’ju japë kortikosteroidë ose ilaçe të tjera për t’ju bërë të ndiheni më mirë. Për disa sëmundje, mund t’ju duhet trajtim për gjithë jetën.